Kulturprisen består av eit diplom og 10 000 kroner, og blir gitt til personar som har gjort ein særleg innsats for kulturlivet i kommunen. Forslaget om å tildele prisen til Bjørdalsbakke kom frå Jon Ragnar Halkjelsvik.

I grunngjevinga går det fram at: 

Per Ottar Bjørdalsbakke har lagt ned tallause dugnadstimar for idretts- og kulturlivet i Vestnes gjennom mange tiår. Han har gjennom alle desse åra hatt ei aktiv rolle i lokalsamfunnet som frivillig for fellesskapet, både innan fotball, friidrett, korps, politikk og med frilufts- og dugnadsarbeid for Kråkvikas venner for å nemne noko. 

Per Ottar stiller alltid velvillig opp, er ein ja- mann og har blitt kalla dugnads-nestor. I 2015 vart han utnemnt til æresmedlem i Vestnes Varfjell IL for sin store innsats for klubben, blant anna for friidrettsgruppa. Han var i si tid ein av stiftarane av det lokale løpet «Flatevågen rundt» som i mange år samla deltakarar frå dei fleste idrettslag i distriktet. 

I 2017 stemte Vestnesavisa sine lesarar han fram som årets eldsjel i Vestnes. Det er knapt den ting han ikkje har vore engasjert og involvert i innan idretts- og kulturlivet i kommunen.

Vestnes kommune vil gratulere Per Ottar Bjørdalsbakke med kulturprisen for 2025!