• Eit avslag på ein søknad om helse- og /eller omsorgstenester.
• at du har fått ei anna teneste enn den tenesta du meiner du treng.
• forhold ved tenesteytinga du ikkje er nøgd med, eller det du meiner er kritikkverdige forhold saksbehandlinga av søknaden din.

Sidan klagesaker er tilbakemeldingar til kommunen om korleis tenestene fungerer i praksis, vil behandling av klagesaker også inngå som ein viktig del av kommunens kvalitetsarbeid.

Klageretten er lovfesta, men på litt ulikt vis for dei ulike klagegrunnlaga som er nemnt ovanfor. Dei viktigaste pasient- og brukarrettane står i pasient- og brukerrettighetsloven. Dersom du meiner at kommunen har brote nokon av desse reglane, finn du klagereglane i kapittel 7 i denne lova. Det er Statsforvaltaren som er klageinstans etter desse reglane, noko som betyr at Statsforvaltaren skal stå som adressat på klagen. Ein slik klage skal innleiast med: Til Statsforvaltaren i Møre og Romsdal.

NB! Klagebrevet skal likevel i dei fleste tilfella sendast til kommunen v/helse – og omsorgstenesta, slik at kommunen kan gå gjennom saken på nytt og sjå om dei bør gjere om vedtaket eller avgjerda.

Klagen må vere skriftleg (sjå nedanfor om hjelp til å klage)

Klagen må vere grunngjeven på ein slik måte at det går fram om klagaren meiner kommunen har brukt feil regelverk eller framstilt reglane feil, eller om det ikkje er lagt tilstrekkeleg vekt på faktiske forhold som klagaren meiner er viktige for saka.

Klagen må vere underteikna av den vedtaket eller avgjerda er retta mot, eventuelt av verje/framtidsfullmektig med mandat på det personlege området, eller andre med gyldig fullmakt frå den personen saka gjeld.

Fullmaktskjema finn du her.

Fristen for å klage er 4 veker frå du fekk vite om vedtaket. Klagen må sendast før fristen går ut.

Klagen skal sendast til:

Vestnes kommune, Tildeling og koordinering, Brugata 10, 6390 Vestnes. 

Du kan alltid be om hjelp frå tilsette på Tildeling og koordinering til å utforme ei klagesak. Dei tilsette vil då kunne hjelpe deg slik at klagen fyller dei formkrava som er nødvendige for at kommunen kan behandle saka.

Dersom klagen er retta mot eit vedtak eller ei anna avgjerd, vil Tildeling og koordinering ta saka til ny vurdering og gå gjennom vedtaket på nytt. Dersom du får medhald i klagen, får du eit nytt skriftleg vedtak.

Når kommunen heilt eller delvis avslår ein søknad om helse og omsorgstenester, skal dei følgje reglane i forvaltningsloven om enkeltvedtak. «Enkeltvedtak» er eit juridisk omgrep som viser til at innhaldet i vedtaket avgjer rettar eller plikter til den som  søker om å få tildelt ei teneste. Reglane i forvaltningsloven krev mellom anna at eit enkeltvedtak til vanleg skal vere skriftleg, og ha ei grunngjeving som på ein forståeleg måte forklarer kva reglar som gjeld på området og kva for faktiske forhold som har vore avgjerande for resultatet.

Om vedtaket eller avgjerda ikkje blir endra, blir klagen, saman med kommunens første saksutgreiing og kommentarar til klagen sendt vidare til Statsforvaltaren i Møre og Romsdal for endeleg avgjerd.

Dersom klagen gjeld kvaliteten på tenesteytinga, som til dømes feil eller uverdig behandling, manglande brukarmedverknad eller informasjonssvikt frå tenesteytaren/helse- og omsorgstenesta, kan den personen saka gjeld, eller ein representant for han eller henne, sende saka direkte til Statsforvaltaren for vurdering av eit mogeleg pliktbrot. Slike saker blir oftast vurdert som mogeleg brot på helsepersonelloven, som er lova der dei fleste pliktene til helsepersonell står samla.  

Om du ikkje får medhald frå Statsforvaltaren, kan du eventuelt sende saka til Sivilombodet. Sivilombodet tar opp nokre få slike saker, særleg  saker som kan ha prinsipiell interesse.  

Lenke til informasjon om korleis du kan klage til Sivilombodet

Du kan òg få hjelp av Pasient- og brukarombodet i Møre og Romsdal. Pasient- og brukarombodet kan mellom  anna ta opp saker til behandling som gjeld den kommunale helse- og omsorgstenesta. Det er ingen formkrav for kontakt med Pasient- og brukarombodet, slik at ein kan ta kontakt både munnleg (i telefon) og skriftleg.  

Lenke til pasient- og brukarombodet, søk opp Møre og Romsdal: https://www.pasientogbrukerombudet.no/vart-arbeid%20

Pasient- og brukerrettighetsloven kapittel 7 Klage m.v.

Pasient- og brukerrettighetsloven kapittel 8 Pasient- og brukerombud.

Helsepersonelloven. Sjå særleg kapittel 11.  

Forvaltningsloven 1967 kapittel VI Om klage og omgjøring.