6 Verdiskaping og attraktivitet
Hovudmål 2: Vi har ein framtidsretta bustadpolitikk og eit variert og konkurransedyktig næringsliv og kulturliv som fremmer bulyst og arbeidsdeltaking for alle grupper av befolkninga.
Zbigniew «Ziggi» Wantuch
Vestnes kommune har i dag aktive bygder der det blir skapt store verdiar gjennom næringsaktivitet innan skipsbygging, mekaniske verkstad, landbruk og havbruk. I bygdene har vi eit aktivt kultur- og idrettstilbod basert på frivillig arbeid med mange eldsjeler. Vestnes har over ein lengre periode arbeidd målretta med tettstadsutvikling i samarbeid med Møre og Romsdal fylkeskommune. Dette har gitt oss eit kompakt og attraktivt sentrum med vekst i handel- og servicenæringa. Vidare arbeid med tettstadsutvikling vil styrke kommunen sin attraktivitet.
Vestnes kommune utmerkar seg ved å ha mange arbeidsplassar innan sekundærnæringar. Skipsindustri og relaterte verksemder er den store berebjelken for sysselsettinga. Det er vanskeleg å få tak i kvalifisert arbeidskraft i alle bransjar. Det er forventa at denne utfordringa vil auke.
I Vestnes har vi ein relativt høg del av unge vaksne som verken er i arbeid eller under utdanning. Vi treng all arbeidskraft vi kan få i framtida. Det er derfor viktig at kommune, stat, og næringsliv samarbeider om å få så mange som mogleg ut i arbeidslivet.
Pendling inn og ut av Vestnes kommune per 4.kvartal 2023. Illustrasjon: MRFylkeVår plassering i fylket gjer at kommunen kan tilby eit rikt tenestetilbod og ein variert arbeidsmarknad med ei reisetid innanfor 60 minutt. Plasseringa gjer det også mogleg å rekruttere arbeidskraft frå andre kommunar og gjere oss attraktive for ny næringsverksemd. Dette fortrinnet må vi utnytte.
I innspel frå innbyggarar går det tydeleg fram at det er ønske om at det blir etablert uformelle møteplassar der folk kan treffast. Mange peikar på at eit sentrum med eit breitt tilbod av varer og tenester er viktig for busetting og attraktivitet i heile kommunen.
For å sikre busetting er det viktig at ein stadig skapar nye og varierte arbeidsplassar. Vestnes kommune må arbeide for å få eit omdømme som kan trekke til seg både arbeidskraft og busetting. Vi må synleggjere kva Vestnes kan tilby av arbeidsplassar og fritidsaktivitetar. God infrastruktur og styrka kommunikasjon i regionen er viktig for busetting og næringsliv. Vestnes må få eit renommé som ein kommune med aktivt og inkluderande kultur-, idretts- og friluftsliv, samhald og fellesskap.
Slik vil vi ha det (delmål):
2.1. Vestnes kommune har eit sterkt og attraktivt sentrum og livskraftige bygder.
Slik gjer vi det (strategiar):
- a) Vi skal utvikle Vestnes sentrum for å gi innbyggarane eit variert handel -og sørvistilbod, attraktive møteplassar og eit variert kulturtilbod.
- b) Vi skal utvikle livskraftige bygder med fokus på kultur, identitet, og særpreg.
- c) Vi skal samarbeide på tvers av bygder, lag og organisasjonar for å legge til rette for eit variert kultur-, idretts- og fritidstilbod.
- d) Vi skal planlegge bumiljø med brei alderssamansetning og som inkludere vanskelegstilte i bustadmarknaden.
- e) Vi skal vektlegge kvalitet og god arkitektur i stadutviklinga.
Slik vil vi ha det (delmål):
2.2. Vestnes har attraktive arbeidsplassar og høg arbeidsdeltaking.
Slik gjer vi det (strategiar):
- a) Vi skal arbeide for eit inkluderande arbeidsliv og tilrettelagte arbeidsplassar.
- b) Vi skal sørge for at ungdom er kjent med arbeidsmarknaden i Vestnes og omkringliggande kommunar.
- c) Vi skal ha ein praktisk retta skule og samarbeid med næringslivet og offentleg sektor for å rekruttere til arbeidslivet.
- d) Vi skal støtte opp om eksisterande næringsliv, nyetablering og gründerverksemd gjennom samarbeid og tilrettelegging.
- e) Vi skal arbeide for at den maritime kulturarven gir grunnlag for vekst, utvikling og identitet.
Slik vil vi ha det (delmål):
2.3. Vestnes er ein attraktiv kommune for oss som bur her, innflyttarar, næringsliv og tilreisande.
Slik gjer vi det (strategiar):
- a) Vi skal arbeide for at Vestnes har eit godt utbygd og vedlikehalde vegnett og framtidsretta dele- og fleksiløysingar for transport.
- b) Vi skal legge til rette for at innbyggarar og tilreisande kan gjere seg nytte av vår unike tilgang til fjord og fjell.
- c) Vi skal samarbeide med innbyggarar, lag og organisasjonar om å utvikle eit breitt tilbod av kultur- og fritidsaktivitetar.
- d) Vi skal arbeide for eit godt barnehage- og skuletilbod og ny felles ungdomsskule.
- e) Vi skal sørge for at vi har tilgjengelege og attraktive næringsareal.
- f) Vi skal nytte dei flottaste areala vi har til bustader og samarbeidar med utbyggjarar for å byggje til ein overkommeleg pris.
Zbigniew «Ziggi» Wantuch