7 Klima, miljø og beredskap
Hovudmål 3: Vi sikrar trygge lokalsamfunn og eit robust livsgrunnlag ved å ta vare på naturen og dei ressursane og tenestene den gir oss.
Zbigniew «Ziggi» Wantuch
FN definerer to miljømessige, globale hovudutfordringar: klimaendringar og tap av naturmangfald. I tillegg er den geopolitiske situasjonen meir usikker og utrygg enn på lenge. Dette er komplekse problemstillingar som krev både lokal og global innsats.
Endringar i arealbruk trugar naturmangfaldet. Tap av naturmangfald påverkar økosystema og reduserer naturen si evne til å utføre viktige oppgåver som til dømes opptak og lagring av karbon, handtering av overvatn, klimaregulering og reinsing av luft og vatn. Det er kommunane som har hovudansvaret for arealbruken i Noreg, og slik har vi ei nøkkelrolle i arbeidet for å hindre tap av naturmangfald. Gjennom gode val no kan vi sikre at framtidige generasjonar kan nyte og nytte naturen og leve godt i Vestnes også i framtida.
Framover vil vi oppleve meir ekstremvêr, auka havnivå og endra nedbørsmønster. Det aukar risikoen for ras, flaum og erosjon. Tiltak for klimatilpassing blir viktige for å beskytte både menneske og infrastruktur.
Samtidig som vi må tilpasse oss endringane som kjem, må vi óg redusere klimagassutslepp for å bremse den vidare utviklinga. Alle delar av samfunnet må bidra til å redusere den samla ressursbruken. Samarbeid, teknologi og innovasjon kan bidra til at vi kan få meir ut av mindre både når det gjeld materialar, energi og areal.
Klimaendringar, krig og terror krev at vi har fokus på beredskap. Straumstans og stopp i vassforsyning kan ha store konsekvensar, men også større dataangrep kan vere lammande for eit samfunn. I ein rask digital omstilling har vi ikkje no fullt ut oversikt over konsekvensane fiendtleg bruk av til dømes kunstig intelligens kan føre til framover. Vi må ha gode planar for korleis vi skal handtere ulike hendingar når dei inntreff. I tillegg må vi vere førebudd på å ta imot nye innbyggarar, då både krigar og effektane av klimaendringane vil føre til store migrasjonsstraumar i verda.
Innspela til kommuneplanen viser at det er stor semje blant innbyggarane i kommunen om at naturen er ein av kommunen sine største styrkar. Vi vil bevare nærleiken til sjø og fjell og ta vare på naturmangfaldet. Innbyggarane er også opptekne av å redusere klimagassutslepp gjennom redusert ressursbruk og sirkulær økonomi, men dei etterspør meir kunnskap om korleis dei best kan bidra. Auka lokal matproduksjon og styrking av økologisk landbruk blir sett på som viktig for beredskapen. Innbyggarane vil verne om matjorda og ønsker løysingar som stimulerer til sjølvdyrking og småskalaproduksjon.
Slik vil vi ha det (delmål):
3.1. Klimagassutsleppa i Vestnes kommune skal innan 2030 vere redusert med 60% i høve referanseåret 2009*.
Slik gjer vi det (strategiar):
- a) Vi nyttar klimabudsjett som eit aktivt verktøy for å identifisere og gjennomføre konkrete tiltak for å redusere klimagassutsleppa.
- b) Vi gjer det enkelt og trygt å velje sykkel, gange og kollektivtransport.
- c) Vi skal auke bevisstheita blant innbyggarane om konsekvensane av klimaendringar og naturtap, og vi motiverer til samarbeid om gode val.
- d) Kommunen skal nytte si innkjøpsmakt til å fremme klimavenlege løysingar og redusere skadeleg miljøpåverking.
- e) Kommunen skal bruke juridiske verkemiddel i planlegginga for å fremme klimavennlege løysingar.
*Før 2009 har ikkje datagrunnlaget tilstrekkeleg kvalitet på kommunenivå. Grunna dette, er det anbefalt at ein set 2009, eller seinare, som referanseår for kommunale utsleppsreduksjonsmål.
Slik vil vi ha det (delmål):
3.2. Vi forvaltar våre ressursar på ein berekraftig måte.
Slik gjer vi det (strategiar):
- a) Vi vernar om viktige naturtypar og stansar tap av biologisk mangfald.
- b) Vi planlegg for kompakt arealbruk og vernar samanhengande naturområde.
- c) Vi stimulerer til opprydding på land og i vatn og gjer tiltak for å hindre forureining og forsøpling.
- d) Vi sikrar langsiktig forvaltning av jord-, og skogressursar gjennom strengt jordvern og aktiv jord- og skogbrukspleie.
- e) Vi sikrar ein framtidsretta bruk av marine ressursar.
- f) Vi skal ta vare på kommunale bygg og anlegg og sørge for at vi vel innovative, fornybare og energieffektive løysingar ved nybygg og rehabiliteringar.
Slik vil vi ha det (delmål):
3.3. Vi har fokus på samfunnssikkerheit og beredskap for å hindre kjente og til no ukjente samfunnstruslar.
Slik gjer vi det:
- a) Vi har planverk for beredskap og risikohandtering basert på oppdatert kunnskap.
- b) Vi arbeider førebuande med klimatilpassing og samfunnsikkerheit for å førebygge konsekvensane av flaum, skred, ras og andre hendingar.
- c) Vi er bevisst risiko og farar knytt til informasjonstryggleik og personvern, og kommunen har oppdaterte strategiar for opplæring og bruk av IKT.
- d) Kommunen skal vere ein pådrivar for å koordinere og styrke samarbeidet mellom dei private vassverka.
- e) Vi samarbeider tett med offentlege og frivillige beredskapsaktørar om lokal beredskap.
Zbigniew «Ziggi» Wantuch