Innbyggardialogen samla aktørar frå frivilligheita og næringslivet for å løfte fram det som fungerer godt, og for å diskutere korleis vi kan byggje vidare på dette saman.
Dette snakka vi om
Ordførar Randi Bergundhaugen opna innbyggardialogen med å setje retning for dagen. Ho peika på at det ofte er lett å fokusere på utfordringar når ein snakkar om utvikling, men at det denne gongen var eit bevisst val å starte med det positive.
Ordførar Randi BergundhaugenHo løfta fram fleire av dei sterke sidene ved Vestnes, som naturen, dei levande lokalsamfunna og det sterke frivillige engasjementet. Samstundes understreka ho at det er innbyggarane sjølve som er det viktigaste grunnlaget for utvikling. Det er dei som skaper aktivitet, initiativ og liv i kommunen, og som gjer Vestnes til meir enn berre ein plass på kartet.
Ordføraren avslutta med eit ønskje om at ein skulle vere nysgjerrig på kvarandre sine perspektiv og bruke dialogen til å skape felles forståing og byggje samarbeid.
Ordførar Randi BergundhaugenKommunedirektør Audhild Mork følgde opp med å forklare bakgrunnen for temaet «Sjå til Vestnes». Ho peika på at det over tid har vore for mykje fokus på det negative i Kommune‑Noreg, og at det no er behov for å løfte fram det som fungerer og byggje vidare på det.
Kommunedirektør Audhild MorkHo uttrykte eit tydeleg ønskje om å skifte perspektiv, frå eit problemfokus der ein leitar etter feil, til å rette merksemda mot løysingar, moglegheiter og felles mål. Ho ønskjer også at fleire går frå passiv venting til aktiv deltaking når det kjem til utviklinga av lokalsamfunnet.
Samstundes understreka ho at vi står framfor reelle utfordringar som ein ikkje kan oversjå. Vestnes står framfor strammare økonomi og færre i yrkesaktiv alder i åra som kjem. Dette vil føre til auka press på kommunale tenester og stille krav til tydelege prioriteringar. Ho peika likevel på at Vestnes har eit godt utgangspunkt for vidare utvikling, med eit sterkt lokalsamfunn, engasjerte innbyggarar, stor frivillig innsats og eit aktivt næringsliv.
Kommunedirektøren benytta også innlegget sitt til å understreke betydninga av dei tilsette i kommunen, og var tydeleg på at dei er dyktige og legg ned ein stor innsats kvar einaste dag for å levere gode tenester.
Kommunedirektør Audhild MorkNeste innleiar var Elisabeth Selnes frå Vestnes Teaterlag. Ho presenterte arbeidet med musikalen Ringer i vatnet, der ho er prosjektleiar. Musikalen tek utgangspunkt i den lokale båtbyggjarhistoria og blei løfta fram som eit døme på kva ein kan få til gjennom breitt samarbeid.
Elisabeth Selnes frå Vestnes TeaterlagProduksjonen har involvert deltakarar på tvers av alder, der både barn, ungdom og vaksne har bidrege. Selnes peika på at det ikkje berre er dei som står på scena som er avgjerande i eit slikt prosjekt. Ei rekkje gode krefter har bidrege med alt frå saum, sminke og rekvisittar til bygging av kulissar og musikalske innslag.
Ho viste også til det tette samarbeidet med ulike aktørar, der mellom anna korps, Røde Kors og biblioteket har bidrege på ulike måtar. Næringslivet har òg vore ein viktig støttespelar, både økonomisk og med tenester. Dette samspelet vart trekt fram som avgjerande for at prosjektet kunne realiserast.
Ho peika på at det er noko heilt spesielt at den lokale båtbyggjarhistoria har blitt løfta fram som ein musikal. Med dette har Vestnes fått sitt eige historiske spel, som formidlar lokal identitet og tilhøyrsle.
Prosjektet fekk gode tilbakemeldingar etter premiere hausten 2025, og det er no planar om ny oppsetjing i 2026. Målet er at dette over tid kan utviklast vidare som ein fast del av kulturlivet i Vestnes.
Elisabeth Selnes frå Vestnes Teaterlag
Neste opp var Tresfjord og Vestnes Røde Kors som var representert ved leiar Jørgen Kjersem og nestleiar Silje Elisabeth Nærhus. Dei gav ei brei innføring i arbeidet organisasjonen gjer lokalt.
Leiar Jørgen Kjersem og nestleiar Silje Elisabeth Nærhus i Tresfjord og Vestnes Røde KorsKjersem starta med å løfte fram at Røde Kors driv med langt meir enn å hjelpe folk ned frå fjellet, som ofte er det mange først tenkjer på. Han gav deretter ei orientering om hjelpekorpset, rolla deira og den breie og varierte opplæringa ein kan få som frivillig i Røde Kors.
Han fortalde også om at dei for kort tid sida, med økonomisk støtte frå næringslivet, har etablert ei eiga dronegruppe. Dette er ein av to slike dronegrupper i heile Møre og Romsdal, og gjer dei i stand til å effektivt drive med søk og redningsarbeid.
Nærhus tok deretter ordet og løfta fram breidda i arbeidet Røde Kors gjer lokalt. Ho viste til korleis frivillige bidreg både sosialt og praktisk, mellom anna:
- Besøksvennordninga, der frivillige besøker personar som opplever einsemd, både heime og mellom anna på Stella Maris.
- Ungdomsklubben SMUD, der Røde Kors bidreg med frivillige for å skape ein trygg og inkluderande møteplass for ungdom.
- Tiltaket Habil, som gir hjelp til øvingskøyring for personar som ikkje har tilgang til dette, og som bidreg til større sjølvstende i kvardagen.
- Deltaking i lokale arrangement, mellom anna Sommarveka, der Røde Kors stiller opp med frivillige.
- Ettermiddagskafé og tysdagskafé, i samarbeid med frivilligsentralen og Vestnes pensjonistlag, som viktige møteplassar for fellesskap og sosialt samvær.
- Språkkafé for flyktningar, som bidreg til inkludering, kvardagsleg språktrening og det å bli kjent med lokalsamfunnet.
- Bruktbutikken i sentrum, der inntektene går tilbake til lokalsamfunnet.
- Julegledeaksjonen, gjennomført i samarbeid med næringsliv, frivilligsentral og kommune, med mål om å gi mat og gåver til familiar som gruar seg til høgtida.
Avslutningsvis understreka Kjersem rolla Røde Kors har i beredskapssamanheng, og det tette samarbeidet med kommunen ved hendingar og kriser.
Leiar Jørgen Kjersem og nestleiar Silje Elisabeth Nærhus i Tresfjord og Vestnes Røde KorsNeste innleiar var Silje Bergslid, dagleg leiar ved Vestnes Fjordhotell. Ho fortalde om vegen vidare som andre generasjons hotelleigar, etter å ha teke over drifta frå foreldra sine.
Silje Bergslid, dagleg leiar ved Vestnes FjordhotellProsessen vart skildra som både lærerik og utfordrande, samstundes som ho peika på mykje optimisme og god støtte. Bergslid løfta fram det gode samarbeidet ho opplever med næringsliv, kommune, sentrumsforeininga og frivilligheita, og at ho kjenner på eit sterkt samspel på tvers.
Ho viste til utviklinga av hotellet, som har gått frå å vere ein «brun pub» og uformell møteplass til å bli eit kurs- og konferansehotell som i dag blir brukt av både kommune, næringsliv og andre aktørar.
Vidare løfta ho fram behovet for å ha tru på Vestnes og at vi må tørre å ha eit endå større sjølvbilete. Ho peika på at mange besøkande blir ei natt i Vestnes, og at det ligg eit potensial i å få dei til å bli litt lenger. Ho løfta spørsmål om kva som skal til for at folk blir ei natt til, og kva Vestnes kan tilby som gjer at dei legg att meir verdiskaping lokalt.
Avslutningsvis uttrykte Bergslid eit ønskje om å bidra aktivt til å synleggjere ulike tilbod i kommunen, og viste til at jo meir ein veit om kva som finst i Vestnes, jo lettare er det å formidle og selje inn tilbod til reisande.
Silje Bergslid, dagleg leiar ved Vestnes FjordhotellNeste innleiar var Gjermund Kvernmo Langset, Chief Development Officer i Bauta Group. Han delte perspektiv frå konsernet si utvikling dei siste åra, og viste til ei reise prega av sterk vekst. I dag har konsernet godt over 600 tilsette og 11 selskap med ulike aktivitetar.
Gjermund Kvernmo Langset, Chief Development Officer i Bauta Group.Langset løfta fram rolla Bauta har som samfunnsbyggar, med lokale tiltak og arbeid for å få fleire i jobb, mellom anna gjennom utplassering og språkpraksis. Han understreka også kor viktig det er å ta vare på dei tilsette og sikre eit godt arbeidsmiljø. At mange vel å bli i konsernet over tid, meinte han er eit teikn på at dei gjer mykje rett.
Han trekte også fram Bauta Metal sitt skjæresenter på Skorgeneset, som blei beskrive som Noregs mest moderne skjæresenter for stål. Han stilte spørsmål ved om nokon andre ville investert om lag 200 millionar kroner i eit slikt initiativ på Skorgeneset, og brukte det som døme på kvifor lokalt eigarskap er så viktig. Han peika også på utviklinga innan oppdrettsteknologi i Romsdalen, særleg arbeid med lukka oppdrettsmerder som eit område med stort potensial framover.
Samstundes var han tydeleg på at det finst utfordringar, og at ein må tørre å sjå og snakke om dei. Demografiske endringar og låg arbeidsløyse gjer det krevjande å rekruttere rett kompetanse. Likevel understreka han at Møre og Romsdal står sterkt som eksportfylke, med store moglegheiter – også for Vestnes.
Vidare løfta han fram behovet for tettare samarbeid mellom skule og næringsliv, og viste til ønsket om eit nasjonalt senter for industriell skipsbygging som eit viktig grep for framtidig kompetanseutvikling. Han peika også på behovet for korte og føreseielege prosessar innan byggesak og tekniske tenester i kommunen.
Avslutningsvis peika han på at Vestnes er kommunen som har mest å vinne på Møreaksen, og han understreka at samferdsel er avgjerande for regional utvikling og betre samanheng i arbeidsmarknaden.
Gjermund Kvernmo Langset, Chief Development Officer i Bauta Group.Eva Langstein, dagleg leiar i Vestnes Næringsforum, orienterte så om arbeidet dei gjer. Næringsforumet er ein interesseorganisasjon for næringslivet, med 135 medlemsbedrifter per i dag.
Eva Langstein, dagleg leiar i Vestnes NæringsforumRekruttering og onboarding blei framheva som eit område næringsforumet er særleg oppteke av. Ho skildra næringsforumet som ein døråpnar, og peika på at dei ofte får førespurnader frå personar som vil flytte heim igjen eller etablere seg i Vestnes for første gong.
Vidare snakka ho om arbeidet med møteplassar og nettverk, og trekte mellom anna fram karrieredagar, yrkesmesse, frokostmøte, næringspubar og Vestneskonferansen. Ho nemnde også at dei har fått ansvaret for å drive hoppID-kontoret vidare, og har inngått ny avtale med kommunen om næringsutvikling. Næringsforumet etablerte i tillegg Cowork i 2022.
Ho gav også eit kort innblikk i arbeidet med omdømme og synlegheit, som samarbeidet om iVestnes på Instagram, eit felles initiativ med Vestnes kommune, og eit samarbeid for å styrkje heile Romsdalsregionen, mellom anna saman med Molde Næringsforum.
Ho viste vidare til tiltak som Søblomsten og arrangementet Jul i Vestnes, og understreka at dette handlar om å byggje identitet, eigarskap og fellesskap, slik at folk skal trivast, kjenne seg heime og ønskje å bli verande eller kome tilbake.
Langstein peika på at eit godt og levande sentrum er heilt avgjerande for å tiltrekkje innbyggarar, og viste til at Vestnes er heldig som har eit tett sentrum. Samstundes understreka ho at mange av sentrumsnæringane er sårbare.
Ho understreka behovet for tett samarbeid mellom kommune og næringsliv. Ho peika på låg arbeidsgivaravgift som eit fortrinn, men løfta også fram behovet for raske prosessar, fleire bustader og ny ungdomsskule. Ho peika til slutt på at Vestnes har mykje energi akkurat no, og at det er viktig å bruke kvarandre godt for vidare utvikling.
Eva Langstein, dagleg leiar i Vestnes NæringsforumResultatet av gruppearbeid
Som på kvar innbyggardialog var det gruppearbeid på ulike bord. Denne gongen vart følgande spørsmål diskutert:
Kva meiner du er det mest positive i Vestnes-samfunnet?
Eit gjennomgåande poeng i samtalane var engasjementet i kommunen. Frivilligheit blei løfta fram som ei viktig styrke, saman med eit næringsliv med mykje driv og vilje til å bidra. Dette vart sett på som ein sentral ressurs for aktivitet og samarbeid i lokalsamfunnet.
Vestnes blei også skildra som ein kommune med høg aktivitet, der det skjer mykje innan idrett, kultur og frivilligheit. Det vart peika på at det finst mange tilbod for dei som vil og tør å engasjere seg, mellom anna gode turmoglegheiter og eit variert kultur- og fritidstilbod.
Det blei vidare vist til at Vestnes har både eit fungerande sentrum og sterke bygdelag, som til saman styrkjer kommunen som heilskap. I denne samanhengen vart det nemnt at kommunen har tilgang på det som blei omtala som «patriotkapital» – lokale aktørar som bidreg med ressursar og engasjement rundt om i kommunen.
God plassering i fylket, at ein blir godt teken imot som ny i kommunen, eit rikt kulturliv og eit godt sentrum blei også nemnt som positive sider ved Vestnes-samfunnet.
Korleis kommuniserer vi dette ut/fram i dag?
Når det gjeld korleis Vestnes kommuniserer det som er bra, meinte fleire at ein er for dårleg til å fortelje om alt som fungerer godt. Det vart peika på at kommunen har mykje å by på, både innan næringsliv, aktivitetar og moglegheiter, men at dette i for liten grad blir formidla, både til eigne innbyggarar og omverda.
Samstundes peika nokon andre på at mykje fungerer bra allereie, og at ein har blitt betre på dette dei siste åra. Det vart vist til at ein jamleg blir eksponert for arrangement og aktivitetar som freistar, men at det alltid er rom for forbetring.
iVestnes blei trekt fram som ei god nettside og plattform som bør brukast meir aktivt og gjerast meir synleg. Lokalavisene fekk også ros for å vere flinke til å formidle det som skjer, medan næringsforumet vart omtalt som offensivt og frampå. Døme som Søblomsten vart nemnt som illustrasjon på kva potensial som finst når ein dreg i lag.
Framsnakking vart løfta fram som noko Vestnes kan bli endå betre på. Det vart understreka at ein bør ta med seg det positive perspektivet inn i eigne arenaer, framsnakke kvarandre og dele informasjon vidare når ein veit om noko som skjer.
Ofte er det lett å leggje merke til det negative, kva er ditt bidrag for at vi ser og fremmar det vi får til?
Ordføraren tok til orde for Vestnes kommune og peika på at kommunen har fått på plass kommunikasjonskompetanse i organisasjonen, at dette merkast, og at det har gitt ein meir fagleg tilnærming til kommunikasjon.
Nokon andre delte eit personleg døme på korleis ein sjølv har framsnakka Vestnes. Dei hadde mellom anna skrytt av det sosiale livet og løfta fram Vestnes som ein familievennleg stad å bu, og peika på at sjølv om ein ikkje skulle ta på seg all æra, endte desse opp med å flytte tilbake til kommunen.
Sosiale medium vart nemnt som ein kanal der mange allereie er aktive, men der det framleis ligg eit potensial. Det vart understreka at ein kan bli meir bevisst på å dele, samarbeide og tenkje heilskapleg.
Det vart også snakka om betydninga av å framsnakke, og at det ein vel å fokusere på er eit val. Det vart vidare framheva at det å bidra til ein meir positiv kultur er eit ansvar alle deler.
Pandeldebatt
Innbyggardialogen blei avslutta med ein paneldebatt der fleire av innleiarane deltok, saman med konstituert leiar for frivilligsentralen, Birgit Vollen. Samtalen samla mange av perspektiva som hadde kome fram tidlegare i dialogen.
Paneldebatt under innbyggardialogenI panelet vart det løfta fram stor stoltheit over Vestnessamfunnet. Naturen, lokalsamfunna, frivilligheita, næringslivet og eit levande sentrum blei nemnt som viktige kvalitetar. Fleire peika på at kombinasjonen av sterke bygdelag, mange aktivitetar, eit rikt kulturliv og eit generøst næringsliv bidreg til at Vestnes er ein attraktiv stad å bu.
Frivilligheita blei trekt fram som heilt avgjerande, både for trivsel og inkludering. Samstundes vart det peika på at næringslivet får mykje att for å støtte frivillige lag og organisasjonar, mellom anna gjennom å kunne tiltrekkje og halde på tilsette over tid.
Samarbeid mellom frivilligheit, næringsliv og kommune vart omtalt som ein styrke, men også som eit område med potensial for vidare utvikling. Det blei løfta fram eit ønske om fleire møteplassar på tvers, der ein kan bli betre kjent med kvarandre, få innsikt i kvarandre sine rammer og samarbeide tettare.
Det vart også peika på betydninga av å løfte fram det positive i større grad, ikkje berre gjennom eiga kommunikasjon, men at lokalavisene også har eit ansvar her. Samla sett blei det teikna eit bilete av eit lokalsamfunn med mykje engasjement, vilje til samarbeid og tru på vidare utvikling.
Dette gjer vi med innspela
Vi kan ikkje svare på alle innspela, men det kom fram nokre tydelege tilbakemeldingar frå dei som møtte opp.
Løfte fram det som fungerer betre
Eit gjennomgåande innspel frå deltakarane var at Vestnes har mykje som fungerer godt, men at dette ofte blir for dårleg kommunisert. Mange meinte både kommunen, næringslivet og frivilligheita kan bli flinkare til å løfte fram det som skjer og det vi får til.
Kommunen er samd i dette, og arbeider allereie med å styrkje kommunikasjonen. Tal frå eigne kanalar viser at synlegheita vår er aukande. Samstundes ligg det eit tydeleg potensial i å bli endå betre, særleg når det gjeld å formidle gode historier og ta i bruk fleire format som bilete og video. Dette er eit arbeid det blir jobba kontinuerleg med.
Samstundes er Vestnes kommune i omstilling og må prioritere ressursane klokt. Eit viktig arbeid som no har høg prioritet og tek opp kommunikasjonsressursar, er utvikling av ny kommunal nettside. Målet er at innbyggarane raskare og enklare skal finne det dei lurer på, og oppleve kommunen som meir oversiktleg og tilgjengeleg digitalt. Meir informasjon om dette arbeidet og moglegheiter til medverknad vil bli delt etter kvart.
Når dette arbeidet er ferdigstilt, vil kommunen ha meir kapasitet til å fokusere på kanalane våre i sosiale medium. Mellom anna med jamnare innhald, betre oversikt over det som skjer i kommunen, og tydelegare synleggjering av gode initiativ og samarbeid i Vestnes.
Fleire arenaer for samarbeid
Det vart løfta fram eit ønske om fleire arenaer der kommune, næringsliv og frivilligheit kan møtast meir uformelt. Målet er betre kjennskap til kvarandre sine roller og rammer, og meir samarbeid på tvers.
Dette tek vi med oss vidare. I første omgang vil kommunen sjå på korleis eksisterande møteplassar og arenaer kan brukast meir aktivt og målretta. Vidare vil kommunen ta med seg dette innspelet til samarbeidspartnarar som Vestnes næringsforum for å sjå korleis behovet for fleire møtepunkt kan følgjast opp på ein praktisk måte.
Stoltheit, identitet og sjølvbilete
Mange innspel handla om stoltheit over Vestnes, knytt til næringsliv, frivilligheit, kultur, lokal historie og eit meir levande sentrum. Samstundes vart det peika på at denne stoltheita ofte ikkje blir sagt høgt nok, og at Vestnes i periodar kan vere for beskjeden med å løfte fram det ein faktisk får til.
Å byggje stoltheit og identitet er eit felles ansvar for kommune, næringsliv, frivilligheit og innbyggarar. Kommunen vil ta med seg dette i arbeidet med kommunikasjonen sin, og vere meir medviten på å løfte fram det Vestnes er kjent for og det vi er gode på. Samstundes er dette noko som må skje i samspel med andre aktørar, gjennom framsnakking, deling og felles eigarskap til historia om Vestnes.