Om tilfluktsrom

Tilfluktsrom er bygde for å kunne gi vern over lengre tid og er utstyrte med mellom anna ventilasjon og vassforsyning.

Det finst både offentlege og private tilfluktsrom:

• Offentlege tilfluktsrom er tilgjengelege for alle som oppheld seg i området.
• Private tilfluktsrom er i hovudsak berekna for personane som bur, arbeider eller oppheld seg i bygget der tilfluktsrommet ligg.

Kommunen har ansvar for vedlikehald av offentlege tilfluktsrom, medan Sivilforsvaret har ansvar for drift og klargjering i ein beredskapssituasjon. For private tilfluktsrom er det eigaren av bygningen som har ansvar for tilfluktsrommet. 

Kvar finn eg offentlege tilfluktsrom i Vestnes?

I kartet finn du oversikt over offentlege tilfluktsrom i Vestnes kommune og resten av landet. Offentlege tilfluktsrom er markerte med gul firkant.

Sjå kart over offentlege tilfluktsrom hos DSB

Adresse til dei offentlege tilfluktsromma i Vestnes kommune:

• Brugata 10 (rådhuset), 100 plassar
• Skulevegen 4 (Vestneshallen), 40 plassar
• Remmemsvegen 85 (Salthammer Båtbyggeri), 35 plassar
• Skorgeneset 31 (Møre og Romsdal Kornsilo), 70 plassar
• Tresfjordvegen 215 (Brastad Skipsservice AS), 48 plassar
• Neremsvegen 4 (Harald Sylte AS), 75 plassar
• Lidvegen 14 (Tomrefjord skule), 60 plassar
• Nybøvegen 2 (Tomrefjord idrettsbygg), 65 plassar 

Kvar finn eg private tilfluktsrom i Vestnes?

Private tilfluktsrom finst i ulike bustad- og næringsbygg og er berekna for personane som oppheld seg i bygningen til vanleg.

Oversikt over plasseringa til private tilfluktsrom er ikkje offentleg tilgjengeleg og kan derfor ikkje delast av kommunen.

Kva vernar tilfluktsrom mot?

Tilfluktsrom gir vern mot eksplosjonar, splintar og samanrasing av bygningar. Dei fleste tilfluktsrom vil redusere skadeverknadene frå konvensjonelle våpen, det vil seie skadar som følgje av trykkbølgjer og splintar.

Nasjonalt er tre av fire tilfluktsrom er dimensjonerte for å gi vern mot farlege gassar. Mange tilfluktsrom vil også bidra til å redusere stråling frå radioaktivt nedfall, og i nokon grad direkte stråling ved kjernefysiske sprengingar.

Les meir om tilfluktsrom på sivilforsvaret.no

Ulike typar tilfluktsstader

Mange tenkjer først og fremst på tilfluktsrom når det er snakk om tilfluktsstader. Kva som er den tryggaste løysinga, vil likevel avhenge av situasjonen og råda frå styresmaktene.

I nokre tilfelle vil det vere tryggast å halde seg der du er. I andre situasjonar kan det vere nødvendig å flytte til eit tryggare område eller søkje vern i tilfluktsrom eller eigna dekningsrom.

Les meir om ulike typar tilfluktsstader på dsb.no